កាលពីថ្ងៃទី ០៩ ខែតុលា ឆ្នាំ ២០២២ កន្លងទៅនេះ Youtuber ពីររូបដ៏ល្បីក្នុងប្រទេសកម្ពុជា ដែលត្រូវបានគេស្គាល់ថាជាលោក ហេង វិសា និង កញ្ញា ជា ស្រីនា បានដឹកដៃគ្នាភ្ជាប់ពាក្យយ៉ាងកក្រើក បន្ទាប់ពីសំងំមើលចិត្តគ្នាយ៉ាងសំងាត់បាំងភ្នែកអ្នកគាំទ្រអស់រយៈពេលយ៉ាងយូរនោះ។
ក្នុងថ្ងៃភ្ជាប់ពាក្យនោះដែរ គេបានកត់សម្គាល់ឃើញមានការចូលរួមពីសំណាងសាច់ញាតិ និង បណ្តាមិត្តភក្តិជាតារាល្បីៗទាំងក្នុងសិល្បៈ ព្រមទាំងអ្នកក្រៅសិល្បៈជាច្រើនកុះករ ដើម្បីជាសក្ខីភាពនៃថ្ងៃដ៏មានន័យសម្រាប់អ្នកទាំងពីរផងដែរ។ ជាមួយគ្នានោះទៀតសោត បណ្តាអ្នកគាំទ្រ Youtuber ទាំងពីរជាច្រើនទៀត ក៏បានចូលរួមជូនពរតាមរយៈទំព័រហ្វេសប៊ុកក្នុងថ្ងៃពិសេសនេះថែមទៀតផង។
យ៉ាងណាមិញ ងាកទៅមើលសម្រស់ម្ចាស់កម្មវិធី ទាំងលោក ហេង វិសាល និង កញ្ញា ជា ស្រីនា ក្នុងថ្ងៃពិសេសកន្លងទៅនោះ ពិតជាស្រស់សង្ហា និង ស្រស់សោភាណាស់ ហើយមើលទៅអ្នកទាំងពីរក៏មានភាពស័ក្តិសមគ្នាគ្មានទាស់ឡើយ។ ដោយឡែក បើនិយាយដល់ប្អូនស្រីរបស់កញ្ញា ជា ស្រីនា ដែលមានឈ្មោះ ជា ស្រីនាថ ឯណោះវិញ នៅក្នុងកម្មវិធីបងស្រី ក៏ត្រូវបានមហាជនកត់សម្គាល់ឃើញពីរូបសម្រស់ស្អាតមិនចាញ់បងស្រីប៉ុន្មានដែរ។
នៅក្នុងថ្ងៃនៃកម្មវិធីនោះ កញ្ញា ជា ស្រីនាថ បានតុបតែងខ្លួនយ៉ាងស្រស់សោភា ជាមួយឈុតបែបប្រពៃណីសំពត់បត់អាវច្នៃយ៉ាងទាក់ទាញពណ៌កំបោរក្នុងកម្មវិធីពេលព្រឹក។ ជាមួយរូបសម្រស់ដ៏ស្រស់សោភានេះ កញ្ញា ជា ស្រីនាថ ក៏បានទទួលការលើកសរសរមិនដាច់ពីមាត់ផងដែរពីមហាជន ពិសេសអ្នកលេញបណ្តាញសង្គមហ្វេសប៊ុក៕
