ក្រោយប្រកាសចូលសិល្បៈជាថ្មី ជាមួយនឹងការសន្យាកែប្រែកំហុសកន្លងមកនោះ គេសង្កេតឃើញថា ម្ចាស់ពានរង្វាន់The Voice Cambodiaរដូវកាលទី១ លោកប៊ុត សីហា ទទួលបានឱកាសជាបន្តបន្ទាប់ពីបុគ្គលល្បីៗជាច្រេីន។
ជាក់ស្ដែង ពេលប្រកាសចូលសិល្បៈដំបូងនោះ ប៊ុត សីហា បានជិះម៉ូតូរបស់ខ្លួនពីខេត្តកំពង់ស្ពឺ ស្កាត់ទៅជួប អ្នកស្រី ទ្រី ដាណា ដើម្បីសុំជំនួយ ក្នុងការផលិតបទចម្រៀងរបស់ខ្លួនបម្រើអារម្មណ៍អ្នកគាំទ្រឡើងវិញ ហើយជាការឆ្លើយតបចំពោះការដឹងខុសចេះកែនេះ ថៅកែហាងពេជ្រចិត្តធម៌ទ្រី ដាណា ក៏ព្រមផ្ដល់ឱកាសឲ្យ។
ក្រោយទទួលបានឱកាសនេះហើយ ប៊ុត សីហា ត្រូវបានអ្នកគាំទ្រជាច្រើន ពិសេសលោកគ្រូម៉ិច សីហា ស្នើសុំទៅអ្នកឧកញ៉ា ឡេង ណាវ៉ាត្រា ដើម្បីឲ្យរូបគេអាចសាងកេរ្ដិ៍ឈ្មោះជាថ្មីលើវិថីសិល្បៈក្នុងផលិតកម្មGalaxy Navatra។ ជាការឆ្លើយតប អ្នកឧកញ៉ាចិត្តធម៌រូបនេះ ក៏យល់ព្រមទៀត។
ទោះរឿងចូលផលិតកម្មGalaxy Navatraនេះ ប៊ុត សីហា ប្រាប់ថា ថ្ងៃចន្ទនឹងប្រាប់លទ្ធផល។ តែអ្វីជាការកត់សម្គាល់ ក្រោយពីទទួលបានជំនួយពីអ្នកស្រីទ្រី ដាណា នោះ ប៊ុត សីហា បានសម្រុកចេញបទចម្រៀងខ្លួនឯងជាបន្តបន្ទាប់ ហើយជាការអរគុណដល់ថៅកែហាងពេជ្រចិត្តធម៌រូបនេះ នៅថ្ងៃទី១៨ ខែកញ្ញា ប៊ុត សីហា បង្ហោះរូបថត១សន្លឹកឈរមុខរថយន្ត រួច ពោលពាក្យថា ៖
«អរគុណណាស់ ដែលបងប្អូនទាំងអស់គ្នានៅគាំទ្រមនុស្សធ្លាប់សាងកំហុសម្នាក់នេះ ហើយក៏អរគុណខ្លាំងជាងគេនោះ គឺលោកជំទាវ ទ្រី ដាណាNNP ដែលផ្ដល់ឱកាសអោយខ្ញុំជួប ផ្ដល់ឱកាសអោយកែខ្លួនឡើងវិញ និងជួយពួកខ្ញុំច្រើន ដោយគ្មានលក្ខខណ្ឌ
ពិតជាអរគុណទឹកចិត្ត ចាប់ពីពេលជួបគាត់មក ពួកខ្ញុំផលិតបទចម្រៀងខ្លួនឯងបានច្រើនទោះមិនទាន់បានស្តង់ដារក៏ដោយ ហើយក៏សង្ឃឹមថា ជោគជ័យខ្លាំងទៅថ្ងៃមុខ ហើយខ្ញុំសន្យាថា នឹងវិលមកសិល្បៈវិញ ប្រើសមត្ថភាពខ្លួនឯង មិនអោយបងប្អូនគ្រប់គ្នាខកបំណងទេ អរគុណពុកម៉ែ បងប្អូន ដែលនៅគាំទ្ររហូតមក ព្រោះខ្ញុំមានពេលនេះម្ដងទៀត ព្រោះតែលោកជំទាវ និងការគាំទ្ររបស់បងប្អូន មានបងប្អូនគាំទ្រខ្ញុំ ខ្ញុំនឹងមានអ្វីគ្រប់យ៉ាងមកវិញមិនខាន(ប៊ុតសីហា)»៕
