ភ្នំពេញ ៖ ជឿជាក់ប្រិយមិត្តពុកម៉ែបងប្អូនជាច្រើនបានជ្រាបដឹងហើយថា កាលពីពេលថ្មីៗកន្លងទៅនេះ តារាចម្រៀងស្រី ពេជ្រ សូលីកា បានជួបនឹងរឿងខកចិត្តចំពោះជីវិតស្នេហារបស់នាងបានដើរដល់ផ្លូវបំបែក ធ្វើឱ្យតារាស្រីរូបនេះជាប់ឈ្មោះជាអ្នកមេម៉ាយកូនមួយទាំងវ័យក្មេង។
ក្នុងនោះដែរ ដ្បិតតែជួបបញ្ហាជីវិតជាច្រើនកន្លងទៅនេះ ពេជ្រ សូលីកា តែងត្រូវបានមហាជនសរសើរខ្លាំងចំពោះភាពរឹងមាំរបស់នាង ដែលតែងបង្ហាញពីជីវិតរស់នៅយ៉ាងរីករាយ និងមានក្ដីសុខ។
យ៉ាងណាមិញ ស្រាប់តែថ្មីៗនេះ ពេជ្រ សូលីកា ធ្វើឱ្យមហាជនភ្ញាក់ផ្អើល និងព្រួយបារម្ភចំពោះនាងខ្លាំង ខណៈបានឃើញនាងបង្ហោះសារលើបណ្ដាញសង្គមហ្វេសប៊ុកបង្ហាញពីភាពទន់ជ្រាយ ដែលបានពោលហត់នឿយ និងតូចចិត្តនឹងជីវិតរបស់ខ្លួនខ្លាំង។ក្នុងនោះ ពេជ្រ សូលីកា មិនបានបញ្ជាក់ច្បាស់ពីមូលហេតុដែលធ្វើឱ្យនាងនិយាយតូចចិត្តនឹងជីវិតបែបនេះឡើយ ដោយគ្រាន់តែរៀបរាប់ថា ៖
«ខ្ញុំមិនដែលត្អូញត្អែរទេ តែពេលខ្លះ ខ្ញុំពិតជាហត់ ហើយតូចចិត្តនឹងជីវិតខ្លួនឯងជាខ្លាំង»។ក្រោយឃើញបែបនេះ មហាជន ក៏ដូចជាអ្នកសិល្បៈជាច្រើន បានធ្វើការបញ្ចេញមតិសួរនាំ និងលើកទឹកចិត្តដល់តារាស្រីរូបនេះគ្រប់គ្នាផងដែរ៕
